കരള്‍ വെന്ത മണം - കവിത

ചില്ലുകുപ്പിയില്‍ അടച്ചുവച്ച
കരളിന്
ചോരയുടെ നിറം കുറവായിരുന്നു.
മണവും.

ദിനം പ്രതി നിറം കുറഞ്ഞ്
റോസ്
ഇളം റോസ്, മഞ്ഞ
വെളുപ്പ്.

മഞ്ഞു പോലെ വെളുത്ത
പതു പതുത്ത കരള്‍
അടുപ്പിന്‍ കൂട്ടിലേക്കിറക്കി,
കരിഞ്ഞു പോകാതിരിക്കാന്‍
എണ്ണ പാ‍കത്തില്‍ പകര്‍ന്ന്
അവള്‍ വറുത്തെടുത്തു.
എണ്ണമണത്തിനൊപ്പം
വെളുത്ത കരള്‍ മണത്തിലവള്‍‍ തുമ്മി.
തുമ്മല്‍ പൂക്കളിറുത്തവള്‍ ഉപ്പളമുണ്ടാക്കി.

കരളിറക്കത്തിലവള്‍
ഫോര്‍ക്കുകൊണ്ടു
കുത്തി
കത്തി കൊണ്ടു
മാന്തി,
കഷണങ്ങളാക്കി മുറിച്ച്
കൊതിയോടെ
അവള്‍ ചവച്ചിറക്കി
എന്നിട്ടും
അവളിലേക്ക് കരള്‍ ഒട്ടിച്ചേര്‍ന്നു.
അവള്‍ക്കു വേണ്ടി പിടച്ചു.
ചൂ‍ടോടെ.